תהילים פרק סז- לַמְנַצֵּחַ בִּנְגִינֹת מִזְמוֹר שִׁיר

א  לַמְנַצֵּחַ בִּנְגִינֹת מִזְמוֹר שִׁיר.
ב  אֱלֹהִים יְחָנֵּנוּ וִיבָרְכֵנוּ יָאֵר פָּנָיו אִתָּנוּ סֶלָה.
ג  לָדַעַת בָּאָרֶץ דַּרְכֶּךָ בְּכָל גּוֹיִם יְשׁוּעָתֶךָ.
ד  יוֹדוּךָ עַמִּים אֱלֹהִים יוֹדוּךָ עַמִּים כֻּלָּם.
ה  יִשְׂמְחוּ וִירַנְּנוּ לְאֻמִּים כִּי תִשְׁפֹּט עַמִּים מִישֹׁר  וּלְאֻמִּים בָּאָרֶץ תַּנְחֵם סֶלָה.
ו  יוֹדוּךָ עַמִּים אֱלֹהִים יוֹדוּךָ עַמִּים כֻּלָּם.
ז  אֶרֶץ נָתְנָה יְבוּלָהּ  יְבָרְכֵנוּ אֱלֹהִים אֱלֹהֵינוּ.
ח  יְבָרְכֵנוּ אֱלֹהִים וְיִירְאוּ אוֹתוֹ כָּל אַפְסֵי אָרֶץ.